Робототехника — балаларды дамытуға бағытталған технологияның пайдасы
Робототехника – балалар үшін қызықты да пайдалы сабақ. Қазақстан Республикасы Президенті Іс басқармасы Медициналық орталығының «Қарлығаш» балабақшасының барлық нысандарында жабдықталған робототехника кабинеттері жұмыс жасайды. Мұнда балаларға ойын режимінде зерттеу және экспериментті біріктіріп, өздігінше жұмыс жасауға мүмкіндік берілген. Бүлдіршіндер заманауи конструктордың төрт түрін, Yohocube картон конструкторын және 3D модельдеу тұтқаларын қолданады.
Педагогтердің пікірінше, робототехника сабағы балаларда ұсақ моториканы, ақыл-ой белсенділігін, тәртіпті, қиял мен зейінді дамытады. Процесс барысында балалар математика, шығармашылық ойлау дағдыларын кеңейтіп, робот жасаудың қарапайым дағдыларын меңгереді.
Тағы бір атап өтерлігі, «Қарлығаш» балабақшасының тәрбиеленушілері түрлі деңгейдегі робототехника жарыстарында жақсы нәтижелерге қол жеткізіп, жүлделі орындарға ие болып келеді.
