Жақсылықтың жаршысы, жаңа жылдың бастауы – Наурыз мейрамы ҚР Президенті Іс басқармасы Медициналық орталығына қарасты «Қарлығаш» балабақшасында жан-жақты аталып өтті.

Еліміздің алдыңғы қатарлы мектепке дейінгі ұйымдарының бірі «Қарлығаш» балабақшасында Наурыз мейрамына орайластырылған іс-шаралар легі бір апта бұрын басталған болатын. Шара аясында балалар көктем мерекесіне арналған тақпақтарын айтты, тамылжыта ән салып, би билеп, өз өнерлерін ортаға салды. Бүлдіршіндер жыл басы Наурыз мейрамын ертегі кейіпкерлерімен бірге қарсы алып, қойылымдарға қатысты, Қыдыр атаны қарсы алып, батасын алды.

ҚР Президенті Іс басқармасы Медициналық орталығына қарасты «Қарлығаш» балабақшасының объектілерінде тәрбиеленушілер Ұлыстың ұлы күніне арнаған суреттерін салып, көрмеге қатысты, тәрбиешілерімен бірге түрлі қолөнер бұйымдарын жасады. Мерекелік іс-шарада балалар күш сынасып, асық ойнап, арқан тартты, орамал алу, теңге ілу, қыз қуу тәрізді ұлттық ойындарда сайысқа түсіп, жылдамдықтары мен ептіліктерін көрсетті.

Тағы бір атап өтерлігі, мерекелік іс-шараларға балабақша тәрбиеленушілерінің ата-аналары мен ата-әжелері де атсалысты. Ата-аналар кішкентай өнерпаздардың өнерін тамашалап қана қоймай, қазақ халқының салт-дәстүрлері туралы әңгімелеп берсе, әжелер педагогтармен бірге бесікке салу рәсімін көрсетті,  ақсақалдар балдырғандарға ақ батасын берді.

«Қарлығаш» балабақшасының педагогтары Наурыз мейрамын атап өту барысында балалардың бойына ұлттық құндылықтарды сiңiру, қазақ халқының тарихын және дәстүрлерiн түсіндіру арқылы олардың елiне, жерiне деген сүйiспеншiгін қалыптастыруды мақсат етеді.